སོ་སོའི་ཕ་མེས་ནས་བརྒྱུད་པའི་བཟང་པོའི་ཡོན་ཏན་རྣམས་བདག་གཅེས་བྱ་རྒྱུ་གལ་ཆེ།

མདུན་ངོས། / སོ་སོའི་ཕ་མེས་ནས་བརྒྱུད་པའི་བཟང་པོའི་ཡོན་ཏན་རྣམས་བདག་གཅེས་བྱ་རྒྱུ་གལ་ཆེ།

ཉེ་ཆར་ངོས་དང་རྒྱ་མི་ཤེས་ཡོན་ཅན་ཞིག་ཐུག་འཕྲད་བྱུང༌། ཁོང་གིས། ཉེ་བའི་ལོ་ཤས་ནང་རྒྱ་ནག་ཏུ་དཔལ་འབྱོར་ཡར་རྒྱས་ཀྱི་འགྱུར་བ་ཧ་ཅང་ཆེན་པོ་ཕྱིན་ཡོད་ཅིང་། དེ་དག་མུ་མཐུད་འགྱུར་བ་འགྲོ་རྒྱུར་ངེས་པ་དང་། ཆབ་སྲིད་ཀྱི་ཐད་ལ་ཡང་འཛམ་གླིང་སྤྱི་དང་མཐུན་པའི་ལམ་སྲོལ་ཞིག་གི་ཐོག་ལ་མི་འགྲོ་ཐབས་མེད་ཀྱི་གནས་སྟངས་ཤིག་གི་འོག་ནས་འགྱུར་བ་འགྲོ་རྒྱུར་ངེས་པ་ཡིན། འོན་ཀྱང་འདས་པའི་ལོ་༥༠ ལྷག་ཙམ་གྱི་རིང་རྒྱ་ནག་ནང་གྲལ་རིམ་འཐབ་རྩོད་སོགས་མི་དང་མིའི་བར་འཁོན་འཛིན་དང་འཐབ་རྩོད་བྱས་ཏེ་རྩ་ཆེའི་དུས་ཚོད་འཕྲོ་བརླག་ཏུ་བཏང་ཡོད་པ་དང་། ལྷག་པར་མིའི་ཡ་རབས་སྤྱོད་བཟང་གི་གོམས་སྲོལ་ཁག་རྩ་བརླག་ཏུ་སོང་སྟེ་བསམ་ཡུལ་ལས་འདས་པའི་འཐུས་ཤོར་བྱུང་ཡོད་ཅིང་། དེའི་དབང་གིས་སྤྱི་ཚོགས་ནང་དཀའ་ངལ་ཧ་ཅང་མང་པོ་ཞིག་འཕྲད་དང་འཕྲད་མུས་སུ་ཡོད། ཡ་རབས་སྤྱོད་བཟང་གི་གོམས་སྲོལ་བཟང་པོ་དེ་དག་བསྐྱར་གསོ་བྱ་རྒྱུར་དུས་ཡུན་རིང་པོ་ཞིག་འགོར་རྒྱུ་ཡིན་པར་བརྟེན། དེའི་ཐད་རྒྱ་མི་ཤེས་ཡོན་ཅན་ཚོར་སེམས་འཚབ་ཧ་ཅང་ཆེན་པོ་ཡོང་བཞིན་ཡོད། ཅེས་བརྗོད་བྱུང༌། དེས་ན་རང་ཅག་བོད་མི་རྣམས་ཀྱིས་སོ་སོའི་ཕ་མེས་ནས་བརྒྱུད་དེ་ཡོང་བའི་ཆོས་དང་རིག་གཞུང༌གིས་མཚོན་པའི་བཟང་པོའི་ཡོན་ཏན་རྣམས་གཅེས་འཛིན་གྱིས་མུ་མཐུད་བདག་པོ་བརྒྱབ་རྒྱུ་གལ་ཆེན་པོ་ཡིན། 

(ཕྱི་ལོ་ ༢༠༠༢ ཟླ་༡༢ ཚེས་༡༨ ཉིན་གྷོ་ཝ་ཁུལ་སྡོད་རང་རིགས་མི་མང་གྲངས་༢༢༣ དང་།  ཕྱི་རྒྱལ་བ་མི་གྲངས་ ༥༣ བཅས་ལ་སྩལ་པ་ལས་བཏུས།)