ད་ཆ་ང་ཚོས་ཐོམ་ཞྭ་ཕུད་དེ་ཕྱི་ནང་ཤེས་ཡོན་དང་བྱམས་བརྩེ་ཟུང་འབྲེལ་བྱ་རྒྱུ་གལ་ཆེ།

མདུན་ངོས། / ད་ཆ་ང་ཚོས་ཐོམ་ཞྭ་ཕུད་དེ་ཕྱི་ནང་ཤེས་ཡོན་དང་བྱམས་བརྩེ་ཟུང་འབྲེལ་བྱ་རྒྱུ་གལ་ཆེ།

དུས་འགྱུར་མ་བྱུང་གོང་རང་རེས་དེང་དུས་ཀྱི་ཤེས་ཡོན་ལ་དོ་སྣང་མ་བྱས་པར་འཐུས་ཤོར་ཆེན་པོ་བཏང་ཡོད། ད་ཆ་ང་ཚོས་ཐོམ་ཞྭ་ཕུད་དེ་ཕྱི་ནང་ཟུང་འབྲེལ་གྱི་ཤེས་ཡོན་དང་། ལྷག་པར་དུ་རིགས་གཅིག་རྐང་འཛིན་གྱི་སློབ་སྦྱོང་ལ་ཤུགས་བརྒྱབ་རྒྱུ་གལ་ཆེ། ཤེས་ཡོན་དང་རྣམ་དཔྱོད་རྐྱང་པས་མི་འགྲིག་པར་དེའི་ཐོག་བྱམས་བརྩེ་དང་གཞན་ཕན་གྱི་བསམ་བློ་དགོས་རྒྱུ་གལ་ཆེན་པོ་ཡིན། བྱམས་བརྩེའི་བསམ་བློས་ཕོངས་ཏེ་ཉོན་མོངས་དུག་གསུམ་གྱི་དབང་དུ་ཤོར་ན་ཤེས་ཡོན་དང་རྣམ་དཔྱོད་ཇི་ཙམ་ཆེ་ཡང་སྤྱི་ཚོགས་ནང་ཕན་ལས་གནོད་ཆེ་བ་ཡོང་གི་ཡོད། སྔར་ང་ཚོའི་སློབ་གྲྭ་ཁག་ཏུ་མཚན་ཉིད་ཀྱི་རིགས་ལམ་སློབ་ཁྲིད་བྱེད་པའི་ལམ་སྲོལ་བཟང་པོ་ཞིག་དར་ཡོད་ཀྱང་བློ་ཕམ་པ་ཞིག་ལ་མུ་མཐུད་རྒྱུན་འཛིན་མ་ཐུབ་པར་བར་སྐབས་ཉམས་ཆག་དང་འཐུས་ཤོར་ཆེན་པོ་བྱུང་ཡོད། མ་འོངས་པར་རིགས་ལམ་སློབ་ཁྲིད་བསྐྱར་གསོ་མཇུག་སྐྱོང་ཐུབ་པ་ཞིག་ངེས་པར་དུ་བྱ་དགོས།

(ཕྱི་ལོ་ ༢༠༠༢ ཟླ་༡༢ ཚེས་༡༨ ཉིན་གྷོ་ཝ་ཁུལ་སྡོད་རང་རིགས་མི་མང་གྲངས་༢༢༣ དང་།  ཕྱི་རྒྱལ་བ་མི་གྲངས་ ༥༣ བཅས་ལ་སྩལ་པ་ལས་བཏུས།)