འགྲོ་བ་མིའི་ཞི་བདེ་དང་སེམས་རྒྱུད་ཡར་རྒྱས་སུ་གཏོང་བར་ཆོས་ཕྱོགས་ལ་འགན་འཁྲི་ཆེན་པོ་ཡོད།

མདུན་ངོས། / འགྲོ་བ་མིའི་ཞི་བདེ་དང་སེམས་རྒྱུད་ཡར་རྒྱས་སུ་གཏོང་བར་ཆོས་ཕྱོགས་ལ་འགན་འཁྲི་ཆེན་པོ་ཡོད།

བར་སྐབས་འཛམ་བུའི་གླིང་འདིར་ཚན་རིག་གི་ཤེས་ཡོན་ལ་ཡར་རྒྱས་ཆེན་པོ་ཕྱིན་ཏེ་མིའི་འཚོ་བའི་གནས་སྟངས་དང་།   ཕྱི་དངོས་པོའི་འཛུགས་སྐྲུན་ཐད་བཟང་ཕྱོགས་ཀྱི་འགྱུར་བ་ཧ་ཅང་ཆེན་པོ་ཕྱིན་ཡོད་པ་ནི་བསྔགས་པར་འོས་པ་ཞིག་ཡིན། འོན་ཀྱང་ཕྱི་དངོས་པོ་ཡར་རྒྱས་སུ་ཕྱིན་པ་ལྟར་ནང་བསམ་བློར་དེ་ལྟ་བུའི་ཡར་རྒྱས་མ་བྱུང་བར་བརྟེན་ནས་དེང་སྐབས་དཀའ་ངལ་གསར་པ་ཧ་ཅང་མང་པོ་ཞིག་ལ་གདོང་ལེན་བྱ་དགོས་ཀྱི་ཡོད། འཛམ་བུའི་གླིང་འདི་བདེ་སྐྱིད་ལྡན་པའི་སྤྱི་ཚོགས་ཤིག་ཏུ་འགྱུར་ཐབས་བྱ་རྒྱུ་ང་ཚོའི་འོས་འགན་ཡིན་ཞིང་། དེ་ལྟར་ཡོང་བར་ཕྱི་དངོས་པོའི་ཡར་རྒྱས་དང་ནང་བསམ་བློའི་ཡར་རྒྱས་གཉིས་ཟུང་དུ་སྦྲེལ་དགོས། ནང་བསམ་བློའི་ཡར་རྒྱས་ཞེས་པ་ནི་དོན་དུ་སེམས་རྒྱུད་ཇེ་བཟང་དུ་གཏང་རྒྱུ་དེ་ཡིན། སེམས་རྒྱུད་ཇེ་བཟང་དུ་གཏོང་བའི་ཐབས་ལམ་བཟང་ཤོས་ནི་ཆོས་ལུགས་ཀྱི་བསླབ་བྱ་ཁག་ཡིན་སྟབས། འཛམ་གླིང་ཞི་བདེ་དང་འགྲོ་བ་མིའི་སེམས་རྒྱུད་ཡར་རྒྱས་སུ་གཏོང་བར་ཆོས་ཕྱོགས་ལ་འགན་འཁྲི་ཧ་ཅང་ཆེན་པོ་ཡོད། འགན་འཁྲི་འདི་ཉིད་ལག་ལེན་དོན་འཁྱོལ་ཡོང་བར་ཁྱེད་ཅག་ཚོགས་འདུར་ཕེབས་མཁན་རྣམས་ཀྱིས་དོན་སྙིང་ལྡན་པའི་གྲོས་བསྡུར་ལྷུག་པོ་གནང་རྒྱུ་ཧ་ཅང་གལ་ཆེན་པོ་ཡིན། 

 (ཕྱི་ལོ་ ༢༠༠༢ ཟླ་བ་ ༡༢ ཚེས་ ༡༧ ཉིན་རྒྱབ་ཏུ་ས་ལར་ཇུང་ Salar Jung འགྲེམས་སྟོན་ཁང་ནས་གོ་སྒྲིག་བྱས་ཏེ་ཉིན་གསུམ་གྱི་རིང་ནང་པའི་ལྟ་གྲུབ་སྐོར་མཁས་པའི་བགྲོ་གླེང་གི་ལྷན་ཚོགས་ཤིག་གནང་རྒྱུའི་ཚོགས་འདུ་དབུ་འབྱེད་ཀྱི་ཚོགས་མགོན་དུ་ཆིབས་བསྒྱུར་བསྐྱངས་ཏེ། ལྷན་ཚོགས་སུ་ཕེབས་པའི་མངའ་སྡེའི་སྲིད་སྐྱོང་དང༌། རྒྱ་གར་དབུས་གཞུང་གི་རིག་གཞུང་དང༌ཡུལ་སྐོར་སྤྲོ་འཆམ་ལས་ཁུངས་ཀྱི་དྲུང་ཆེ་སོགས་སྐུ་མགྲོན་ཁག ཚོགས་ཞུགས་ནང་ཆོས་མཁས་དབང་དང༌ཞིབ་འཇུག་པ་སོགས་ལ་སྩལ་པ་ལས་བཏུས།)