གང་ཤེས་སེམས་རྒྱུད་ལ་སྦྱར་ནས་ཉིན་རེའི་མི་ཚེའི་ནང་གྲུབ་འབྲས་མིག་གིས་མཐོང་ཐུབ་པ་ཞིག་ཡོང་བར་བྱ་རྒྱུ་དེ་ཧ་ཅང་གལ་ཆེན་པོ་ཡིན།

མདུན་ངོས། / གང་ཤེས་སེམས་རྒྱུད་ལ་སྦྱར་ནས་ཉིན་རེའི་མི་ཚེའི་ནང་གྲུབ་འབྲས་མིག་གིས་མཐོང་ཐུབ་པ་ཞིག་ཡོང་བར་བྱ་རྒྱུ་དེ་ཧ་ཅང་གལ་ཆེན་པོ་ཡིན།

ས་གནས་འདི་ནི་དཔལ་མགོན་འཕགས་པ་ཀླུ་སྒྲུབ་ཞབས་ཀྱི་གནས་དང་ཐག་ཉེ་ཡིན་པ་དང་ངོས་རང་དཔལ་མགོན་ཀླུ་སྒྲུབ་ཀྱི་རྗེས་འཇུག་སློབ་མ་ཞིག་ཡིན་སྟབས། རྣམ་ཀུན་འདི་ཁུལ་བཅར་སྐབས་སེམས་ནང་ཚོར་སྣང་མི་འདྲ་བ་ཞིག་ཡོང་གི་འདུག ངོས་ལ་འཕགས་ཡུལ་བྱང་ཆུབ་ཆེན་པོའི་ཆོས་ཚོགས་ནས་མགྲོན་འབོད་བྱུང་བ་ལྟར། ཕྱི་ལོ་༡༩༥༦ ལོར་བདག་ཅག་གི་སྟོན་པ་མྱ་ངན་ལས་འདས་ནས་ལོ་༢༥༠༠ འཁོར་བའི་དུས་དྲན་ལ་བཅར་རྒྱུའི་གོ་སྐབས་བཟང་པོ་ཞིག་བྱུང་ཞིང་། སྐབས་དེར་ཀླུ་སྒྲུབ་ཀྱི་གནས་རྩ་ཆེན་འདི་མཇལ་རྒྱུའི་གོ་སྐབས་བཟང་པོ་ཞིག་བྱུང་མྱོང་།   འཛམ་གླིང་འདིར་ཆོས་ལུགས་སྤྱི་དང་ལྷག་པར་ནང་ཆོས་ལ་དམིགས་བསལ་གྱིས་དོ་སྣང་ཆེན་པོ་བྱེད་བཞིན་པའི་དུས་སྐབས་བཟང་པོ་འདིར། ང་ཚོ་ནང་པ་རང་ཉིད་ཀྱིས་ནང་པའི་གཞུང་ནས་གསུངས་པའི་ལྟ་གྲུབ་ལ་དད་པ་དང་ཡིད་ཆེས་ཡོད་པ་གཅིག་པུས་མི་འགྲིག་པར་ནང་ཆོས་ཀྱི་དོན་སྙིང་ཇི་ཡིན་ངོ་འཕྲོད་པར་བྱས་ཏེ་ཤེས་ནས་དད་པ་ཐོབ་པ་ཞིག་དང༌། གང་ཤེས་པ་རྣམས་སེམས་རྒྱུད་ལ་སྦྱར་ནས་ཉིན་རེའི་མི་ཚེའི་ནང་གྲུབ་འབྲས་མིག་གིས་མཐོང་ཐུབ་པ་ཞིག་ཡོང་བར་བྱ་རྒྱུ་དེ་ཧ་ཅང་གལ་ཆེན་པོ་ཡིན། ནང་ཆོས་དང་དེང་རབས་ཚན་རིག་གི་དབར་མཐུན་པའི་ཆ་མང་པོ་ཡོད་ཅིང་། ཇི་ཙམ་ནང་ཆོས་ལ་སློབ་སྦྱོང་དང༌བརྟག་དཔྱད། ཉམས་ལེན་བྱས་པ་དེའི་ཚོད་ཀྱི་སེམས་ནང་བྲོ་བ་མི་འདྲ་བ་ཞིག་རྙེད་རྒྱུ་ཡོད་པ་ཧ་ཅང་གསལ་པོ་ཡིན། ཚན་རིག་པ་མང་པོས་ཀྱང་དེ་ལྟར་ངོས་འཛིན་བྱེད་ཀྱི་ཡོད། 

 (ཕྱི་ལོ་ ༢༠༠༢ ཟླ་བ་ ༡༢ ཚེས་ ༡༧ ཉིན་རྒྱབ་ཏུ་ས་ལར་ཇུང་ Salar Jung འགྲེམས་སྟོན་ཁང་ནས་གོ་སྒྲིག་བྱས་ཏེ་ཉིན་གསུམ་གྱི་རིང་ནང་པའི་ལྟ་གྲུབ་སྐོར་མཁས་པའི་བགྲོ་གླེང་གི་ལྷན་ཚོགས་ཤིག་གནང་རྒྱུའི་ཚོགས་འདུ་དབུ་འབྱེད་ཀྱི་ཚོགས་མགོན་དུ་ཆིབས་བསྒྱུར་བསྐྱངས་ཏེ། ལྷན་ཚོགས་སུ་ཕེབས་པའི་མངའ་སྡེའི་སྲིད་སྐྱོང་དང༌། རྒྱ་གར་དབུས་གཞུང་གི་རིག་གཞུང་དང༌ཡུལ་སྐོར་སྤྲོ་འཆམ་ལས་ཁུངས་ཀྱི་དྲུང་ཆེ་སོགས་སྐུ་མགྲོན་ཁག ཚོགས་ཞུགས་ནང་ཆོས་མཁས་དབང་དང༌ཞིབ་འཇུག་པ་སོགས་ལ་སྩལ་པ་ལས་བཏུས།)