གནའ་དེང་ཤེས་ཡོན་གཉིས་ལྡན་ཞིག་ཡོང་ཐབས་བྱ་རྒྱུ་ཧ་ཅང་གལ་ཆེན་པོ་ཡིན།

མདུན་ངོས། / གནའ་དེང་ཤེས་ཡོན་གཉིས་ལྡན་ཞིག་ཡོང་ཐབས་བྱ་རྒྱུ་ཧ་ཅང་གལ་ཆེན་པོ་ཡིན།

རྒྱུན་དུ་བརྗོད་བཞིན་པ་ལྟར་བོད་ཀྱི་མ་འོངས་པའི་གནས་ཚུལ་ཅིར་འགྱུར་དོན་གྱི་བདག་པོ་བོད་རྒྱ་ཆེའི་མི་མང་གིས་ཐག་གཅོད་བྱ་རྒྱུ་རེད། འོན་ཀྱང་ངོས་ཀྱིས་བོད་རང་བཙན་གཙང་མ་རྩོད་ལེན་མི་བྱེད་པར་ཆོལ་གསུམ་གཅིག་ཏུ་བསྒྲིལ་བའི་མིང་དོན་མཚུངས་པའི་རང་སྐྱོང་གཙང་མ་ཞིག་ཡོང་ཐབས་ཀྱི་དགོས་འདུན་བཏོན་ཏེ།   སྐབས་འཕྲལ་བོད་ཀྱི་ཛ་དྲག་གི་དཀའ་ངལ་སེལ་ཐབས་བྱེད་ཀྱི་ཡོད་ཅིང་། དེའི་ཐོག་འཛམ་གླིང་སྤྱི་ལ་ཕན་པའི་བོད་ཀྱི་ཐུན་མོང་མ་ཡིན་པའི་ཆོས་དང༌རིག་གཞུང་སྲུང་སྐྱོབ་ཆེད་འབད་བརྩོན་བྱེད་ཀྱི་ཡོད། རང་སྐྱོང་ཡོང་ཐབས་ཀྱི་ཐབས་ལམ་ཡང་འཚེ་མེད་ཞི་བར་བརྟེན་པ་ཞིག་ཡིན། རྒྱ་ཕྱོགས་ནས་བོད་དེ་ལོ་རྒྱུས་ཀྱི་ཐོག་ནས་རྒྱ་ནག་གི་ཆ་ཤས་ཤིག་ཡིན་པར་ཁས་ལེན་དགོས་པའི་ཆ་རྐྱེན་འདོན་བཞིན་ཡོད་མོད། འོན་ཀྱང་འདས་པའི་ལོ་རྒྱུས་ནི་ལོ་རྒྱུས་ཀྱི་ངོ་བོ་རང་ལ་གནས་རྒྱུ་ལས་ཆབ་སྲིད་ཀྱི་དགོས་མཁོར་བརྟེན་ནས་བཟོ་བཅོས་རྒྱག་ཐབས་མེད། ལོ་རྒྱུས་སུ་གང་བྱུང་བ་དེ་ལོ་རྒྱུས་ལས་གསལ་པོར་མཐོང་ངེས་རེད། ང་ཚོས་དྲང་བདེན་དང༌འཚེ་བ་མེད་པའི་ལྟ་གྲུབ་ལ་བརྟེན་ནས་རང་དབང་རྩོད་ལེན་བྱེད་ཀྱི་ཡོད་སྟབས། ཤེས་བྱ་ཡོན་ཏན་དང་ལྡན་པ་ཞིག་དགོས་རྒྱུ་དེ་ཧ་ཅང་གལ་ཆེན་པོ་ཡིན། ཤེས་ཡོན་མེད་ན་རྩ་དོན་འགྲུབ་ཐབས་མེད་པས་རང་རེའི་ན་གཞོན་རྣམས་ཀྱིས་རྒྱུན་དུ་དེང་དུས་ཀྱི་ཤེས་བྱ་ཡོན་ཏན་ལ་དོ་སྣང་སྦྱང་བརྩོན་བྱ་རྒྱུ་ཤིན་ཏུ་གལ་ཆེ་ཞིང་། དེའི་ཐོག་གནའ་རབས་ནས་དར་བའི་རང་རེའི་ཐུན་མོང་མ་ཡིན་པའི་བཟང་པོའི་ཤེས་ཡོན་དེ་དག་ཀྱང་ཚད་དང་ལྡན་པ་ཞིག་ཤེས་པར་བྱས་ཏེ། མདོར་ན།  གནའ་དེང་ཤེས་ཡོན་གཉིས་ལྡན་ཞིག་ཡོང་ཐབས་བྱ་རྒྱུ་ཧ་ཅང་གལ་ཆེན་པོ་ཡིན། གང་ཤེས་པའི་ཡོན་ཏན་དེ་དག་ཚིག་ཙམ་དུ་མ་སོང་བར་སེམས་རྒྱུད་ལ་སྦྱར་ཐུབ་པ་ཞིག་དང་ལག་ལེན་ལ་བསྟར་ཐུབ་པ་ཞིག་བྱུང་ན་སྤྱི་སྒེར་ཀུན་ལ་ཕན་ཐོགས་ཆེན་པོ་ཡོང་ངེས་ཡིན།  

 (ཕྱི་ལོ་༢༠༠༢ ཕྱི་ཟླ་༡༢ ཚེས་༡༧ ཉིན་ཨན་དྷ་ར་པྲ་དེ་ཤི་ Andhara Pradesh གྲོང་ཁྱེར་གྱི་ཧེདྲབྷཌ་ Hydrabhad མགྲོན་ཁང་དུ་ཉེ་འཁོར་ནས་འདུ་འཛོམས་བྱུང་བའི་སློབ་ཕྲུག་དང་སུད་ཚོང་བ་སོགས་རང་རིགས་མི་མང་བཞི་བརྒྱ་ལྷག་ཙམ་ལ་སྩལ་པ་ལས་བཏུས། )