དྲང་བདེན་ལ་གཞི་བཅོལ་བའི་འཚེ་བ་མེད་པའི་འཐབ་རྩོད་ལ་དོ་སྣང་དང་རྒྱབ་སྐྱོར་བྱེད་མཁན་ཇེ་མང་དུ་འགྲོ་བཞིན་ཡོད།

མདུན་ངོས། / དྲང་བདེན་ལ་གཞི་བཅོལ་བའི་འཚེ་བ་མེད་པའི་འཐབ་རྩོད་ལ་དོ་སྣང་དང་རྒྱབ་སྐྱོར་བྱེད་མཁན་ཇེ་མང་དུ་འགྲོ་བཞིན་ཡོད།

བོད་རང་དབང་ཤོར་བ་སོགས་བོད་ནང་བསམ་ཡུལ་ལས་འདས་པའི་དུས་འགྱུར་བྱུང་སྟེ།  ད་ཆ་མི་ལོ་༤༣ ལ་ཉེ་བ་འགྲོ་བཞིན་ཡོད་ཀྱང་། བོད་དོན་རང་དབང་འཐབ་རྩོད་འདི་དྲང་བདེན་ལ་གཞི་བཅོལ་བ་ཞིག་ཡིན་པ་དང༌། རྩ་དོན་སྒྲུབ་བྱེད་ཀྱི་ཐབས་ལམ་ཡང་འཚེ་བ་མེད་པའི་ལམ་ལ་འགྲོ་བཞིན་ཡོད་སྟབས། བོད་པའི་གནད་དོན་རྒྱ་གཞུང་གིས་ནག་བསུབ་ཏུ་གཏོང་མ་ཐུབ་པ་མ་ཟད། དེང་སྐབས་འཛམ་གླིང་ནང་བོད་དོན་ལ་དོ་སྣང་དང༌རྒྱབ་སྐྱོར་བྱེད་མཁན་ཇེ་མང་དུ་འགྲོ་བཞིན་ཡོད། བོད་ནང་ལ་མཚོན་ན་གཞིས་ལུས་རྒྱ་ཆེའི་མི་མང་གིས་ད་ལྟའི་བར་དུ་ལྷག་བསམ་འགྱུར་བ་མེད་པའི་སྒོ་ནས་རང་ཚུགས་བརྟན་པོར་བཟུང་སྟེ་རྩ་དོན་ལངས་ཕྱོགས་མཐའ་འཁྱོངས་བྱས་ཡོད་ལ། ཐ་ན་རྒྱ་གཞུང་གི་ལས་བྱེད་ཡིན་པའི་བོད་རིགས་དེ་དག་གིས་ཀྱང་ཕྱིའི་སྣང་ཚུལ་ལ་རྒྱ་གཞུང་གི་གླ་ཕོགས་ལེན་པ་སོགས་རྒྱ་མིའི་ལས་ཀ་བྱེད་བཞིན་ཡོད་ཀྱང་ནང་དོན་བོད་མི་རིགས་ཀྱི་ལ་རྒྱ་དང༌། བརྩེ་ཞེན་སོགས་འགྱུར་བ་མེད་པར་གནས་ཡོད། འདི་ག་རང་དབང་ལུང་པར་གནས་པའི་བོད་མི་དེ་དག་གིས་ཀྱང་ད་ལྟ་ཕན་ཆད་ལ་ཧུར་ཐག་བྱས་ཡོད་ལ། ད་དུང་ཡང་རང་དབང་བསྐྱར་གསོའི་ལས་དོན་སྒྲུབ་པར་སྔར་བས་རིག་པ་བསྒྲིམ་རྒྱུ་ཤིན་ཏུ་གལ་ཆེ། 

(ཕྱི་ལོ་༢༠༠༢ ཕྱི་ཟླ་༡༢ ཚེས་༡༧ ཉིན་ཨན་དྷ་ར་པྲ་དེ་ཤི་ Andhara Pradesh གྲོང་ཁྱེར་གྱི་ཧེདྲབྷཌ་ Hydrabhad མགྲོན་ཁང་དུ་ཉེ་འཁོར་ནས་འདུ་འཛོམས་བྱུང་བའི་སློབ་ཕྲུག་དང་སུད་ཚོང་བ་སོགས་རང་རིགས་མི་མང་བཞི་བརྒྱ་ལྷག་ཙམ་ལ་སྩལ་པ་ལས་བཏུས། )