ཉོན་མོངས་པ་སྐྱོན་དུ་ཤེས་མཁན་ཤར་ཕྱོགས་ཀྱི་ལྟ་གྲུབ་ཀྱི་ནང་དུ་མ་གཏོགས་ཧ་ལམ་མེད།

མདུན་ངོས། / ཉོན་མོངས་པ་སྐྱོན་དུ་ཤེས་མཁན་ཤར་ཕྱོགས་ཀྱི་ལྟ་གྲུབ་ཀྱི་ནང་དུ་མ་གཏོགས་ཧ་ལམ་མེད།

སྤྱིར་དེང་སྐབས་འཛམ་བུ་གླིང་འདིར་ཉོན་མོངས་པ་སྐྱོན་དུ་ཤེས་མཁན་ཤར་ཕྱོགས་ཀྱི་ལྟ་གྲུབ་ཀྱི་ནང་དུ་མ་གཏོགས་ཧ་ལམ་མེད་པ་ལྟ་བུར་འདུག །མི་བསད་པ་དང་རྐུ་བྱས་པ་ལྟ་བུ་ཉེས་པ་ཡིན་པ་འཇིག་རྟེན་ཡོངས་གྲགས་རེད། འོ་ན་མི་གསོད་པ་དང་རྐུ་བྱེད་པ་སོགས་གང་གི་དབང་གིས་བྱུང་ཞེ་ན། ཆགས་སྡང་གི་དབང་གིས་བྱུང་བས་ན་དེའི་རྩ་བ་དེད་ན་སེམས་མ་དུལ་བར་ཐུག་ཀྱང་དེར་བརྟག་དཔྱད་བྱེད་མཁན་སྤྱིར་ཤར་ཕྱོགས་ཀྱི་ཆོས་དང་། དེའི་ནང་ཚན་ནས་ནང་པ་སངས་རྒྱས་པའི་ཆོས་གཙོ་བོ་ཡིན། དེས་ན་རྨོས་ལྟ་བུ་གཏིང་ནས་སློག་མཁན་སངས་རྒྱས་པའི་ཆོས་འདི་ཡིན། ཀུན་སློང་ཟློག་ཐབས་བྱས་ཏེ་དེས་དྲངས་པའི་ལུས་ངག་གི་ཉེས་པ་འགོག་དགོས་པ་ཡིན། ཀུན་སློང་མ་དུལ་ན། མི་གསོད་མི་ཆོག་པ་དང་། རྐུ་བྱེད་མི་ཆོག་ཅེས་ཁྲིམས་བསྡམས། སྐོར་སྲུང་བ་བཙུགས་པ་སོགས་རྒྱ་ཆེན་བྱས་ཀྱང་མི་གསོད་མཁན་དང་རྐུ་བྱེད་མཁན་དག་དེ་ལས་གྲུང་བ་དང་། དེ་ལས་མགོ་བདེ་པོར་གྱུར་ནས་ཐབས་ལམ་གསར་པའི་སྟེང་ནས་མི་གསོད་པ་དང་རྐུ་བྱེད་པ་ཡིན། ཀུན་སློང་ནས་བཟློག་ན་ཕྱི་ནས་ཁྲིམས་སོགས་གང་ཡང་མི་དགོས་པར་རང་ཁྲིམས་རང་གིས་བསྲུངས་ནས་ཆུ་རྩ་བ་ནས་བཀག་པ་ལྟ་བུ་ཞིག་འོང་བ་ཡིན། དེ་ལྟ་མིན་ན་ཕྱི་ནས་ཆུ་རགས་ཇི་ཙམ་བརྒྱབ་ཀྱང་ཆུ་ག་དུས་ཀྱང་ལུད་འོང་བ་ལྟ་བུ་ཡིན། དེས་ན་མི་ཚེ་གཅིག་གི་ཆ་ནས་དང་། ཚེ་རབས་གཏན་གྱི་འདུན་མ་བསྒྲུབ་པ་གང་གི་ཆ་ནས་ཀྱང་སེམས་འདུལ་བ་ནི་དངོས་གནས་གལ་ཆེན་པོ་ཡིན། དེའི་ཕྱིར་མིག་དཔེ་སྟོན་མཁན་དང་། བསླབ་བྱ་བྱེད་མཁན་གྱི་བླ་མ་དེའི་ཕྱོགས་སུ་རང་ཉིད་ཇི་ཙམ་ཉེ་བའི་ཚོད་ཀྱིས་རང་ཉིད་ལ་བཟང་པོའི་ཡོན་ཏན་རྣམས་འགོ་བ་སྟེ། ཇི་སྐད་དུ། གང་ཞིག་གསེར་གྱི་རི་ལ་གནས་བཅས་ན། །དེ་ཡི་འདབ་ཆགས་ཐམས་ཅད་གསེར་དུ་འགྱུར། །ཞེས་གསུང་སྒྲོས་ལ་ཡོད་པ་བཞིན་ཡིན།།

ཕྱི་ལོ་༡༩༨༠ ལོར་སྩལ་བའི་བླ་མ་མཆོད་པའི་ཉམས་ཁྲིད་ལས་བཏུས།