༸གོང་ས་མཆོག་གིས་སྔར་ནས་དགོངས་བཞེད་ཡོད་པའི་ནཱ་ལེནྡྲའི་ཤེས་ཡོན་ལྟེ་གནས་ཁང་གསར་འཛུགས་གནང་རྒྱུ་གཏན་འཁེལ་ཡོད་སྐོར་བཀའ་སློབ་སྩལ་བ། 

མདུན་ངོས། / ༸གོང་ས་མཆོག་གིས་སྔར་ནས་དགོངས་བཞེད་ཡོད་པའི་ནཱ་ལེནྡྲའི་ཤེས་ཡོན་ལྟེ་གནས་ཁང་གསར་འཛུགས་གནང་རྒྱུ་གཏན་འཁེལ་ཡོད་སྐོར་བཀའ་སློབ་སྩལ་བ། 

༄༅། །ཕྱི་ལོ་ ༢༠༢༠ ཟླ་ ༡ ཚེས་ ༡༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་གྱི་བཞུགས་སྒར་དགའ་ལྡན་འཕེལ་རྒྱས་གླིང་གི་མཇལ་འཕྲད་ཁང་དུ་ཨ་རི་བ་དང་། བོད་རིགས། འབྲུག་པ། ཧི་མ་ལ་ཡའི་རི་བརྒྱུད་ཀྱི་མི་རིགས་སི་ཀེམ་པ་དང་། བལ་མི། དེ་བཞིན་རྒྱ་ནག་སྐམ་ས་ཆེན་པོ་དང་ཐའེ་ཝན་གྱི་རྒྱ་རིགས། རྒྱ་གར་བ་སོགས་མི་གྲངས་ ༢༦༠ བརྒལ་བར་མཇལ་ཁ་དང་སྔར་ནས་དགོངས་བཞེད་ཡོད་པའི་ནཱ་ལེནྡྲའི་ཤེས་ཡོན་ལྟེ་གནས་ཁང་གསར་འཛུགས་གནང་རྒྱུ་གཏན་འཁེལ་ཡོད་སྐོར་བབཀའ་སློབ་སྩལ་ཡོད་པ་རེད། 

དེ་ཡང་སྔ་དྲོ་ཆུ་ཚོད་ ༩།༠༠ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རི་བ་བཅུ་ཕྲག་ཅིག་ལ་སྟོང་ལོ་གསར་པའི་ཀུན་སྤྱོད་(Ethics for the new millennium)ཀྱི་སྐོར་ལ་བཀའ་སློབ་སྩལ་རྗེས་མཇལ་མང་ལ་བཀའ་སློབ་སྩལ་དོན། ཐེངས་འདིར་རྡོ་རྗེ་གདན་ལ་བསྡད་ནས་སང་ཉིན་ངོས་རང་པཱ་ཊི་ན་(patna)ལ་ཕྱིན་ནས་དེ་གའི་མངའ་སྡེའི་བློན་ཆེན་(chief minister)ལ་མཇལ་འཕྲད་གནང་རྒྱུ་ཞིག་ཡོད། ངོས་ལ་བསམ་བློ་གསར་པ་ཞིག་ཡོད། རྡོ་རྗེ་གདན་གྱི་ཉེ་འཁོར་དུ་བླ་མ་བཟོད་པ་རིན་པོ་ཆེར་ས་ཆ་ཞིག་ཡོད་པ་རེད། ངོས་རང་དེ་སྔ་དེར་ཕྱིན་པ་ཡིན། དེའི་རྒྱ་རྒྱུད་དེར་རིམ་བཞིན་ཏཱ་ལའི་བླ་མའི་ནཱ་ལེནྡྲའི་རིག་གནས། གང་ལྟར་ཆོས་གཅིག་པུ་མ་ཡིན་པར་སེམས་ཁམས་རིག་པ་དང་། ཚད་མ་རིག་པ། ལྟ་གྲུབ་སོགས་སློབ་སྦྱོང་བྱེད་ས་ཡོད་པའི་སློབ་གཉེར་ལྟེ་གནས་ཁང་ཞིག་ཡོང་རྒྱུ་ཕལ་ཆེར་གཏན་འཁེལ་བ་ཡིན།   དེ་ལྟ་བུ་ཞིག་བང་རིམ་སྒྲིག་བཞིན་ཡོད། དེར་བརྟེན། སང་ཉིན་པཱ་ཊི་ན་ལ་མངའ་སྡེའི་བློན་ཆེན་ལ་བཀའ་མོལ་ལྷོད་ལྷོད་ཞུ་རྒྱའི་རྩིས་དེ་ལྟར་ཡིན། མཁྱེན་སོང་ངམ། 

སངས་རྒྱས་བཅོམ་ལྡན་འདས་མངོན་པར་རྫོགས་པར་སངས་རྒྱས་པའི་གནས་ཧ་ཅང་རྩ་ཆེན་པོ་རེད། དེའི་ཉེ་འདབས་ལ་དཔལ་ནཱ་ལེནྡྲའི་ཆོས་བརྒྱུད་ཤེས་ཡོན་གྱི་སྡེ་ཚན་ནང་ལ་བཞག་ནས་སློབ་སྦྱོང་བྱ་རྒྱུ་ཡོད་པ་ཞིག་ལ་ངོས་ཀྱིས་བསམ་བློ་གཏོང་གི་ཡོད་པ་རེད། མཁྱེན་སོང་ངམ། ས་གནས་གཞུང་གིས་ཀྱང་ཐུགས་ཁུར་ཆེན་པོ་བཞེས་ཀྱི་འདུག སྲིད་སྐྱོང་ལའང་ངོས་ཀྱིས་སྔོན་མ་སྐད་ཆ་བྱུང་། ཁོ་རང་སེམས་ཤུགས་འཕར་ནས་དེའི་སྟེང་ལ་རྐང་ལས་ཀ་བྱེད་ཀྱི་ཡོད་པ་རེད། རིམ་བཞིན་བཅོམ་ལྡན་འདས་སངས་རྒྱས་པའི་གནས་རྩ་ཆེན་པོ་ཡིན་པ་ཙམ་དུ་མ་ཟད་པའི་དེའི་ཉེ་འདབས་ལ་སྔོན་གྱི་ནཱ་ལེནྡྲ་སྐད་གྲགས་ཡོད་པ་དེ་ལ། ནཱ་ལེནྡྲ་གཉིས་པ་ཞིག་ཆོས་ཕྱོགས་ཀྱི་སྐད་ཆ་གཅིག་པུ་མིན་པར་ཤེས་ཡོན་གྱི་སྡེ་ཚན་བྱས་ནས་འཛུགས་རྒྱུ་བང་སྒྲིག་ཡོད་པ་རེད། མཁྱེན་སོང་ངམ། རིམ་བཞིན་སློབ་སྦྱོང་བྱེད་སའི་ལྟེ་གནས་ཤིག་ཆགས་སོང་ན་དེར་སློབ་སྦྱོང་ལ་ཡོང་མཁན་མང་པོ་ཞིག་ཡོང་གི་རེད་ལ། ངོས་ཡང་དེར་དུས་དང་དུས་སུ་སླེབས་ཀྱི་རེད། རྡོ་རྗེ་གདན་ལའང་ཡོང་གི་རེད། ཤེས་ཡོན་གྱི་སྡེ་ཚན་གསར་བ་ཞིག་འཛུགས་ཐུབ་པ་དེས་ངོས་རང་འདིར་ཡོང་བར་འབྲེལ་བ་ཆགས་ཀྱི་ཡོད་པ་རེད། མཁྱེན་སོང་ངམ།

རྡོ་རྗེ་གདན་གནས་ཁྱད་པར་ཅན་ཆགས་ཡོད། ང་རང་ཚོས་སངས་རྒྱས་བཅོམ་ལྡན་འདས་ཞེས་དད་པ་བྱེད་སའི་ཡུལ་གཙོ་བོ་ཞིག་ལ་བརྩི་བཞིན་ཡོད་པ་རེད། བཅོམ་ལྡན་འདས་རང་གིས། ཐུབ་རྣམས་སྡིག་པ་ཆུ་ཡིས་མི་འཁྲུ་ཞིང༌།། འགྲོ་བའི་སྡུག་བསྔལ་ཕྱག་གིས་མི་སེལ་ལ།། ཉིད་ཀྱི་རྟོགས་པ་གཞན་ལ་སྤོ་མིན་ཏེ།།  ཆོས་ཉིད་བདེན་པ་བསྟན་པས་གྲོལ་བར་འགྱུར།། ཞེས་སེམས་ཅན་གྱི་སྡུག་བསྔལ་གྱི་རྒྱུ་སྡིག་པ་དེ་བཅོམ་ལྡན་འདས་ཀྱིས་ཆུ་ཡིས་འཁྲུ་ཐུབ་ཐབས་ཡོད་པ་མ་རེད། སྡུག་བསྔལ་དེ་ཕྱག་གིས་སེལ་ཐུབ་ཐབས་ཡོད་པ་མ་རེད། བཅོམ་ལྡན་འདས་ཀྱི་ཐུགས་རྒྱུད་ཀྱི་རྟོགས་པའི་ཡོན་ཏན་དེ་ང་ཚོ་མར་སྦྱིན་རྒྱུ་ཡོད་པ་མ་རེད། བཅོམ་ལྡན་འདས་ཀྱིས་ཅི་ཞིག་གནང་ཐུབ་ཀྱི་རེད་ཅེ་ན། བླང་དོར་ཡིན་ལུགས་ཀྱི་གནས་བསྟན་ནས་གདུལ་བྱའི་བླང་དོར་གྱི་གནས་ལ་རྨོངས་པའི་མུན་པར་སོ་སོས་བསམ་བློ་བཏང་། སློབ་སྦྱོང་བྱས་ནས་བླང་དོར་གྱི་གནས་ལ་རྨོངས་པའི་མུན་པ་སེལ་ནས་མཐར་སྡུག་བསྔལ་གྱི་རྒྱུ་གཙོ་བོ་ཀུན་འབྱུང་བདེན་པར་གཉེན་པོ་བསྟེན་པའི་ཐོག་ནས་སྤངས་པའི་བྲལ་བའི་ཡོན་ཏན་འགོག་བདེན་ཐོག་པ་ཞིག་དང་།  བཅོམ་ལྡན་འདས་ཀྱིས་ཆོས་འཁོར་དང་པོ་གསུངས་པའི་སྐབས་སུ་སྡུག་བསྔལ་བདེན་པ། ཀུན་འབྱུང་བདེན་པ། འགོག་པའི་བདེན་པ། ལམ་གྱི་བདེན་པ་ཞེས་བདེན་པ་བཞི་གསུངས་ཡོད། བཅོམ་ལྡན་འདས་ཀྱི་ཆོས་ཀྱི་རྩ་བ་འདི་རེད། སློབ་སྦྱོང་བྱས། རྩད་གཅོད་བྱས་ཏེ་སེམས་ཁམས་རིག་པའི་ཐོག་ནས་ནང་བསམ་བློར་རྩད་གཅོད་བྱས་ཏེ་ཉོན་མོངས་ཆགས་སྡང་སྐྱེས་པའི་རྒྱུ་ཇི་ལྟར་ཡོང་གི་ཡོད་པ་དང་། རྐྱེན་ཇི་ལྟར་ཡོང་གི་ཡོད་པ་ཤེས་པར་བྱས་ཏེ་བློ་ལ་འགྱུར་བ་གཏོང་རྒྱུ་ཞིག་ལ། ཆོས་ཉིད་བདེན་པ་བསྟན་པས་གྲོལ་བར་འགྱུར།། ཞེས་པ་དེ་ལྟར་རེད། 

དེར་བརྟེན། ང་རང་ཚོ་སངས་རྒྱས་པའི་ཆོས་ལ་དད་པ་བྱེད་མཁན་ཚོས་སློབ་སྦྱོང་བྱེད་རྒྱུ་ཧ་ཅང་གལ་ཆེན་པོ་རེད། དད་པ་གལ་ཆེན་པོ་དང་རྩ་ཆེན་པོ་རེད། ཡིན་ནའང་། དད་པ་ལ་དབང་རྣོན་ཆོས་ཀྱི་རྗེས་འབྲང་གི་དད་པ་གཅིག་དང་། དབང་རྟུལ་དད་པའི་རྗེས་འབྲང་གི་དད་པ་གཅིག་བྱས་ཏེ་རིགས་གཉིས་འདུག དབང་རྣོན་ཆོས་ཀྱི་རྗེས་འབྲང་གི་དད་པ་ནི་སངས་རྒྱས་པའི་ཆོས་ཀྱི་རྒྱུ་མཚན་གང་འདྲ་འདུག གནད་འགག་གང་འདྲ་འདུག་པར་དཔྱད་པ་བྱས་ཏེ་དད་པ་སྐྱེས་ཡོང་བ་དེ་དབང་རྣོན་ཆོས་ཀྱི་རྗེས་འབྲང་གི་དད་པ་རེད། སངས་རྒྱས་བཅོམ་ལྡན་འདས་རྩ་ཆེན་པོ་རེད་ཟེར་བའི་གྲགས་པ་ཙམ་གྱི་རྗེས་སུ་འབྲང་ནས་དད་པ་བྱེད་པ་ནི་དབང་རྟུལ་དད་པའི་རྗེས་འབྲང་ཟེར་བ་དེ་རེད། མཁྱེན་སོང་ངམ། ང་ཚོ་དུས་རབས་ ༢༡ པའི་ནང་པ་རེད། དེར་བརྟེན། སངས་རྒྱས་པའི་ཆོས་ཀྱི་གནད་འགག་ཤེས་པ་བྱས་ཏེ་དད་པ་བྱུང་བ་ཡིན་ན། དད་པ་དེ་རྒྱུ་མཚན་ལྡན་པའི་དད་པ་དང་དད་པ་བརྟན་པོ་ཆགས་ཀྱི་ཡོད་པ་རེད། 

དེང་སང་གིས་དུས་ཚོད་ལ་ནང་པའི་ཆོས་ལ་དོ་སྣང་ཡོད་མཁན་ཚོས་ནང་པའི་ཆོས་ཇི་ལྟ་བུ་ཞིག་ཡིན་པ་ལ་སློབ་སྦྱོང་བྱེད་པ་དང་། སྔོན་ལ་སྤྱོན་འཇུག་ལས་སླ་བོ་རེད། བྱང་ཆུབ་སེམས་དཔའི་སྤྱོད་པ་ལ་འཇུག་པའི་དེབ་དེ་ཧིན་དྷུའི་ནང་ཡོད་པ་རེད། ཨིན་ཇི་དང་རྒྱ་ཡིག་ནང་ཏུའང་ཡོད་པ་རེད། ང་ཚོའི་བོད་ཡིག་ཨ་ཅང་ཅང་། སྤྱོད་འཇུག་ལ་ཏོག་ཙམ་བལྟ་ཐུབ་ན། སྤྱོད་འཇུག་གི་ལེའུ་དྲུག་པ་བཟོད་པའི་ལེའུའི་ནང་དུ་ཁོང་ཁྲོ་ལ་སྐྱོན་གང་དག་ཡོད་པ་ཧ་ཅང་གསལ་བོ་གསུངས་ཡོད། དེ་ལ་བསམ་བློ་ཏོག་ཙམ་གཏོང་ཐུབ་པ་ཡིན་ན་ཁོང་ཁྲོ་ཟེར་བ་དེར་རྒྱུ་མཚན་མེད་པར་སོ་སོའི་སེམས་དཀྲུགས། མི་ལའང་མ་བདེ་བ་ཡོང་བ་ཞིག་རེད། དེར་བརྟེན། བཟོད་པའི་ལེའུ་དེ་ཁོང་ཁྲོ་ཤུགས་ཆུང་དུ་གཏོང་བ་ལ་ཧ་ཅང་ཕན་ཐོགས་འདུག དེ་ནས་ལེའུ་བརྒྱད་པ་བསམ་གཏན་གྱི་ལེའུ་རེད། དེར་རང་གཅེས་འཛིན་ལ་སྐྱོན་ཇི་འདྲ་ཡོད་པ་དང་། གཞན་གཅེས་འཛིན་ལ་ཕན་ཐོགས་གང་དག་ཡོད་པ་རྣམས་ཧ་ཅང་གསལ་བོ་ཡོད། དེར་བརྟེན། སྤྱོད་འཇུག་གི་གཞུང་ལས་གཙོ་བོ་ལེའུ་དྲུག་པ་དང་བརྒྱད་པར་ག་ཚོད་ཐུབ་ཐུབ་ཀྱིས་ཀློག་པ་དང་བསམ་བློ་བཏང་བ་ཡིན་ན་དེས་ཧ་ཅང་ཕན་གྱི་རེད། ངོས་རང་གིས་རྡོ་རྗེ་གདན་དུ་ཁུ་ནུ་བླ་མ་རིན་པོ་ཆེ་བསྟན་འཛིན་རྒྱལ་མཚན་གྱི་སྐུ་མདུན་དུ་སྤྱོད་འཇུག་གི་བཤད་ལུང་ཞུས་ནས་ཧ་ཅང་ཕན་ཐོགས་བྱུང་སོང་། ཁྱོད་རང་ཚོའང་དེ་དེ་བཞིན་རེད། སྤྱོད་འཇུག་གི་གཞུང་ལ་དོ་སྣང་ཏོག་ཙམ་བྱོས། 

ད་ལྟ་བཤད་པ་ལྟར་ངོས་རང་སང་ཉིན་འདི་ནས་ཐོན་འགྲོ་གི་རེད། ཁྱོད་རང་ཚོ་ཡང་འདིར་གནས་སྐོར་ནས་བག་ཆགས་མང་པོ་བཞག་ཡོད་པ་རེད། ལས་བཟང་པོ་བསགས་ཡོད་པ་རེད། དེ་འཁྱེར་ནས་སོ་སོའི་ནང་ལ་ལོག ནང་ལ་ལོག་ནས་༸རྒྱལ་བ་རིན་པོ་ཆེས་སྤྱོད་འཇུག་ཐོན་ཞེས་འབོད་སྐུལ་བྱས་པ་དེ་སེམས་ལ་ཉར་ནས་སྤྱོད་འཇུག་ངེས་པར་ཏུ་ཐོན། མཁྱེན་སོང་ངམ། བཀྲ་ཤིས་བདེ་ལེགས། ཞེས་བཀའ་སློབ་སྩལ་ཡོད་པ་རེད།